تخطي المنافس واستغلاله

تخطي المنافس والصعود بالمحتوي 

بص يا سيدي محتواك هوا اللي بيعبر عن مدي فهمك بالموضوع ، وانتا شخص نزلت الموضوع علشان تقولهم شوف اية الجديد علشان اكسب من وراك وبس ، والا شخص عايز الزائر يكون قد مسئوليتك اللي اديتها ليه انه يكون زائر يومي ويكون متشوق يشوف مقالاتك ، اللي بنخطط ليه في كيفية تخطي واسغلال المنافس.

 كيفية الصعود بالمحتوي وتخطي المنافسين .

اولا كده علشان تكون شخص فاهم بجد وتعرف سواء عميلك أو الزائر إنك هتقدر تساعده ، وعلشان تقدر تصعد بنشاطك ده وتفهم العميل إنك تستحق بجد المكانة دي يبقي ندوقة الأكله ، وعلشان احنا متأكدين من إن الطعم مختلف هيحب يدوق الحلو ، وساعتها لازم نسيب أثر كويس بطعمنا .
وده هيتلخص في بعض الخطوات .

معلومات المنتج .

يعم‎‏ إية اللي بتقوله ده دي مقالة مش منتج ؟ لا مقالتك هيا منتجك الخاص بيك ، وعلشان تقدر تعرف معلوماتها يبقي تبحث بأكتر من صيغة باكتر من لغة ، وتجميع المعلومات سواء كانت تم إعاده صياغتها ، او بلغات مختلفه ، ونشوف إيه اللي صح وإيه اللي غلط ، طبعا الامر متعب ومحتاج مجهود لكن هيكون في نتيجة وتحقيق رغباتنا ، وهيعود علينا بأكبر فائدة .

تحليل المنافس .

المنافس لو قدرت تعمله تحليل دم يبقي ياريت .

المنافس مش طريقة كتابه او رد علي تعليقات وبس ، معرفة المنافس معرفة كاملة ، ودي اهم الاشياء اللي يجب معرفتها عن المنافس .

لازم تعرف عن المنافس .

ودي اهم الحاجات اللي هتعرفها عنه علشان تتخطاه بسهولة .

طريقة كتابة المحتوي .

تشوف المنافس كاتب عربيه فصحي والا عامية ، كاتب المحتوي بنفسه والا معين ناس معاه ، والا ناسخ المحتوي ومغير بعض الكلمات .

 طريقة التعامل .

طريقة تعامل المنافس مع الزائر او العميل ، بيرد عليهم والا لا في الاستفسارات ، بيتعامل معاهم بطريقة انقر كليك وطريقة خدمة العملاء اللي اغلبها رخمة ، بيكون كل همه فلوس وبس والا افادة برضه ، كل ده تقدر تعرفه منه بس طبعا متقولهوش انك منافس ، لا هتشوف الردود علي تلعيقات الناس ، هتكلمه كانك عميل عنده وهتقدر تعرف الاجابات اللي فوق دي بطريقتك .

بيستهدف مين .

وده طبعا لازم تعرفه ، اذا بيستهدف ناس فاهمة والا مبتدئ ، سنهم بيبدأ من كام ، شباب وبنات  متزوجين والا لا ، متوسط دخلهم لو فيهم ناس بتشتغل ، كل ده هيفيدك في الصعود بالمحتوي بتاعك ونشاطك بشكل عام .

 اماكن تواجدهم .

وده هيخليك تقدر تستهدفهم صح لما تحب تعمل ممول او حتي وانتا بتستخدم الطرق المجانية ، تعرف من بلد ايه ، المنطقة اللي داخل البلد دي ، ظروف البلد ايه كل ده هيساعدك انك تكتب محتوي يرضي الناس ، وتقدر تعرف هما محتاجين اية .

  قدر الافاده .

هل المنافس احسن منك ، بيحب يطور نفسة والا شخص عادي اي كلام وخلاص بيكتبه ،  والزائر بيستفاد بكل المعلومات اللي بيشرحها الكاتب ، نسبة الاسئلة اللي موجودة تحت المحتوي ، اسئلة خارجه عن المقاله والا لا ، كل ده بيوضح قدر الافادة وهل الزائر بيوصل بسهوله للمعلومات علشان طريقة المنافس كويسه .

 مصادره  .

طبعا المصادر مهمة جدا ، فحاول تعرف المصادر اللي بيجيب منها المعلومات دي ، وتحاول تدور علي مصادرك الخاصة بيك علشان تكتب محتوي جديد ومختلف برضه .

 لدرجة إنك لو قدرت تعرف بيعمل اية حاليا سواء عميلك ، او المنافس ، يبقي كده عشره علي عشره .
طبعا بعد ما عرفنا كل الحاجات اللي فوق دي وعرفنا اجابتها يبقي كده سهل علينا اننا نسافر بالمحتوي .
ودي اهم الطرق اللي هتقدر تتخطي بيها المنافس .

كيفية تخطي المنافس .

ودي اهم العوامل اللي لازم تعرفها وتنفذها علشان تقدر تتخطاه .

هنكتب محتوي احسن منه .
هنلخص للزائر اللي محتاجه بسهولة .
هنجاوب علي اسئلة الزائر .
هنشوف الزائر فين ونروحله .
هنكتب بعض الاسئلة ونشوف اجابة الزائر .
هنعمل مسابقات ( انتا وراحتك طبعا ) .
هنشوف ايه اللي محتاجه وهنعمله .
هندرس معلومات ونذاكر اكتر علشان نكتب جديد .
هنتعامل بشكل احسن مع الزائر (هنعمل ليه شاي وقهوة) .

دي افضل الطرق اللي ممكن تستخدمها ، علشان الزائر والعميل يتكلم عنك بشكل كويس في كل مكان .
وانتا طبعا لازم تفكر اكتر وتشوف ، ايه اللي تقدر تفيد بيه الزائر احسن من كده ، وايه اللي تقدر تعمله علشان تكون احسن من المنافس .
دمتم في رعاية الله وحفظه واتمني اكون افدتك  ، ولو محتاج شرح معين او نقطة محتاجة توضيح اكتبها بتعليق او تواصل معنا عبر الفيسبوك او البريد الالكتروني ، ولو في اي تعليق سلبي او إيجابي متحرمناش علشان نحسن من نفسنا ، ونكون علي قدر ثقتك بنا .